《當你想成為小智嘅時候，先發現自己已經係大木博士》
由黑白GameBoy開始，我哋多咗個夢－「成為小智，做精靈訓練員。」
而嗰位交託小精靈畀你嘅大木博士？
你或者只係諗：「點解你唔同我哋一齊四圍去，打道館呀？」
Gameboy時代嘅你懷住呢個問題，揮手告別，獨自happy。
尋日《Pokemon Go》一出，全城瘋狂。
好多人都想補完呢個「小智夢」 。
但睇住大家跑去屯門公園，向櫻花雨聚集，用Km換取精靈蛋孵化。
再望返自己，就發現「周街跑」原來係一件咁奢侈嘅事。
你返朝9晚10，漸漸發現GPS並冇郁動過。
放工亦未必係閒雲野鶴，
有需要陪嘅人、應該做嘅事。
最後除咗啲自動爬上你張電腦枱嘅精靈之外，你並無捉到甚麼。
為咗比卡超，或者可以請一日假，咁第二日呢？
一日時間，你只有搭巴士嗰時可以玩下，
路線唔係自己定，去邊個地標全睇司機心情。
即使差一步就去到GYM，但巴士唔會幫你甩尾。
隨住引擎聲音，你得到嘅係「This Gym is too far away.」
或者你會唉一句：
「我見過踩單車嘅小智，但真係冇見到坐巴士嘅小智。」
冇錯，因為你已經唔係小智，而係大木博士。
呢個博士，有正職有研究，有智識有能力，但再冇青春。
當佢著起呢件白袍，就再冇去發電廠、冇去紫苑鎮、唔會挑戰四大天王。
同你一樣。
熱潮嘅嘢，可能一星期後就變樣，畢竟遊戲一場。
你知道童年回不去，小智始終係一個夢。
不知不覺，未瞓已經醒返，你就成為咗大木博士，
喺自己研究所，用Facebook睇住一班仲有本錢嘅年輕人，喺手機介面上輕狂一番。
又諗返起細細好嘅問題：「大木博士，點解唔一齊冒險呀？」
呢一刻嘅你，拎住唯一一隻CP14嘅精靈，都可以微笑講出一句 ：
「我明白啦。」
Ig: cheungson88
*會慢慢update生活短文上去
Search